partekatu
Juan Luis Cid EAJko zinegotziak jasandako erasoa gaitzetsi du ibarrako PSE-EEk
Fernando Narciso Ibarrako udal-talde sozialistako bozeramaileak gaitzetsi egin du Juan Luis Cid EAJko zinegotziak joan den igandean aurpegian ukabilkada bat eta sabelean ostikada bat jaso ostean pairatu zuen erasoa. “Onartezina da zinegotzi jeltzaleari gertatutakoa; haren helburua, Ibarrako udalbatzako gainerako zinegotziena bezala, gure herritarren zerbitzura egotea da”, esan du, maila pertsonalean bere elkartasuna eta familia sozialistarena helarazi zizkiola azaldu ondoren.
Prentsa-ohar batean esan duenez, “zinegotzi jeltzaleak jasandako erasoak iraganeko garaiak, eta kargu instituzional sozialistek jasan zituzten jazarpen-egoerak gogorarazten dizkigu”, zehazki, herri txikietan zinegotzi karguan ari zirenak, udalbatzan gehiengoa abertzalea, eta batzuetan alderdi konstituzionalista baten ordezkari bakarra zirenak.
Fernando Narcisok batasuna eskatu die Ibarrako udalean ordezkatuta dauden indar politiko guztiei gaitzespen testu bat adosteko eta gure bizilagunei indarkeriaren aurkako mezu “argi” bat bidaltzeko. Hain zuzen, Igor Zapirain EHBilduko alkateari eskatu dio, gertatutakoaren larritasuna ikusita, publikoki ager dadila, Juan Luis Cid zinegotziari elkartasuna adieraziz, eta ez dezala egin iazko abuztuan bezala, ez baitzuen gaitzetsi Tolosaldeko ETAko presoak Euskal Herriratzea eskatzen zuen ekitaldi bat, Ernaik, Sortuko Gazteek antolatua eta Ibarrako jaietako egitarau ofizialean gehituta.
“Isiltasunak konplize egiten gaitu”, esan dio Zapiraini. Are gehiago, ekintza horrek indar politiko guztiei interpelazio zuzena egiten gaitu, eta, beraz, hausnarketa sakona egin behar dugu Ibarran horrelako gertaera gaitzesgarria berriro gerta ez dadin. “Elkarrekin borrokatu behar dugu herritar bati eraso egiteko eskubidea dutela uste dutenen aurka”.
