partekatu
Hondarribiko PSE-EEk Udal Gobernuaren gardentasun falta salatu du HAPOren txostenaren kudeaketan
Udal Talde Sozialistak deitoratu du, beste behin ere, Abotsanitz eta EH Bilduren gobernuak ez jakinaraztea gainerako alderdiei udalerriarentzat garrantzi handia duten gaiak
Hondarribiko PSE-EEk Udal Gobernuaren jokabidea kritikatu du, Euskal Autonomia Erkidegoko Lurralde Antolamendurako Batzordeak Hiri Antolamenduko Plan Orokor (HAPO) berriari buruz egindako txostenari buruzko prentsa-oharra argitaratu ondoren, Udalean ordezkaritza duten gainerako alderdiei aldez aurretik informaziorik eman gabe.
Udal Talde Sozialistarentzat “harrigarria da, beste behin ere, parte-hartzeaz hainbeste harrotzen diren Abostsanitz eta EH Bilduk txostenaren edukia prentsa ohar baten bidez publiko egitea erabaki izana, aldez aurretik oposizioko taldeei helarazi gabe eta dagokion batzordean jorratu gabe. “Beste behin ere, komunikabideen bitartez garrantzi handiko gaien berri izan genuen, aldez aurretik informazioa eskuratzeko aukerarik eta analisi politikorako aukerarik izan gabe”, salatu dute sozialistek.
Ildo horretan, PSE-EEren ustez, jokabide horrek gardentasun eta errespetu instituzional falta kezkagarria erakusten du. "Ez da onargarria Hondarribiko hirigintza-etorkizunerako funtsezkoa den dokumentu bat udal-ordezkariei bizkarra emanda kudeatzea", adierazi dute.
Era berean, sozialistek kritikatu dute prentsa-oharrak txostenaren ikuspegi partziala ematen duela, alderdi positiboak soilik nabarmenduz eta funtsezko informazioa alde batera utziz. “Batzordeak HAPOn sartzea eskatzen dituen ohar eta doikuntza teknikoak ez dira inoiz argi azaltzen”, azpimarratu dute. Ustez, zehaztasun falta horrek beharrezko aldaketen benetako irismena ezagutzea eragozten du.
PSE-EEren ustez, bereziki larria da gai horiek modu generikoan soilik aipatzea, zer alderdi zuzendu behar diren eta zer inplikazio izan ditzaketen zehaztu gabe. "Ezin da konfiantza sortu azaleko mezuetan informazio garrantzitsua ezkutatuz edo lausotuz", gaineratu dute.
Horregatik guztiagatik, Udal Talde Sozialistak Udal Gobernuari eskatu dio txosten osoa berehala eman dezala, dagokion batzordea dei dezala aztertzeko eta hain garrantzitsua den dokumentu baten kudeaketa gardena eta parte-hartzailea berma dezala.
"HAPOk Hondarribiaren etorkizuna markatuko du, eta ezin da aldebakartasunetik edo propagandatik heldu. Ezinbestekoa da zorroztasunez, informazio osoarekin eta eztabaida politikoarekin aritzea ", amaitu dute.
