PSE-EE PSOE Socialistas Vascos

Arrasateko PSE-EEk EH Bilduren gobernuari eskatu dio udalerriaren irudiari eragiten dioten eta utzikeria eta zikinkeria sentsazio kezkagarria eragiten duten grafitien eta pintaden ugaritzeari aurre egiteko ekintza plan bat martxan jartzeko.

Hain zuzen ere, sozialistek zenbait eraikinen egoera salatu dute, hala nola, Kulturola, Seber Altube plaza eta sindikatuen eraikina. Azken kasu horretan, zuzkidura-bizitokiak eraiki berri dituzte eta utzikeriaren sentsazioa dago. "Bereziki deigarria da eraiki edo birgaitu berri diren espazioetan utzikeria irudi bat zabaltzea", adierazi du Aritz Murua bozeramaile sozialistak.

Udal Talde Sozialistak gogorarazi du garbitasuna mantentzea eta espazio publikoa zaintzea Udalaren erantzukizun zuzena dela, jarduera puntualetatik haratago joan behar duela eta estrategia integral eta eraginkor baten alde egin behar duela. Ildo horretan, plan integral bat egitea proposatzen du, berehalako garbiketa-lanak, prebentzio-neurriak, herritarrak kontzientziatzeko kanpainak eta gizalegearen aurkako portaeren aurreko zigorrak uztartuko dituena.

Muruak ohartarazi duenez, pintadak ugaritzeak "udalerriaren estetikari eragiteaz gain, zuzeneko eragin ekonomikoa du diru-kutxa publikoetan, eta horiek kentzeak arrasatear guztiei eragiten dien kostua dakar".

Horregatik guztiagatik, PSE-EEren  ustez, premiazkoa da jardutea  "udalerriarekiko errespetua islatzen duten espazio garbiak eta zainduak nahi baditugu. Horregatik, EH Bilduri eskatzen diogu ekin dezala, ez  beste alde batera begiratzeko eta neurriak berehala hartzeko ", azaldu du Muruak.

Sozialistek bandalismorik gabeko udalerri baten alde egin dute, ingurunearekiko errespetua nagusi izango den udalerri baten alde.