partekatu
Lezoko PSE-EEk "LEZON" aldizkariaren kutsu alarmista eta interesatua kritikatu du eta Udalaren kaudimen ekonomikoa defendatu du
Duela gutxi LEZON aldizkariaren ale berezi eta monografiko bat banatu da postontzietan, Udalaren egoera ekonomikoa ardatz hartuta
Lezoko PSE-EEk adierazi du ez dagoela ados argitalpenaren tonuarekin eta edukiarekin; izan ere, uste du EH Bilduk panorama bidegabeki alarmista erakusten duela, "neurririk hartu ezean, blokeo egoera batera irits litekeelako, Udalaren jasangarritasun finantzarioa arriskuan jarri epe ertain eta luzera", eta horrek, besteak beste, 2026 eta 2027 urteetarako plan ekonomiko-finantzario bat gauzatzea ekarriko luke.
Honen aurrean, Lezoko PSE-EEk zera adierazi nahi du, Udal Kontuhartzailetzaren arabera, “Udalaren egoera ekonomikoa ona da Gipuzkoako Udal Ogasunen testuinguru orokorrean, sarrera arruntek gastu arruntak gainditzen dituztelako, soberakin hori inbertsioa finantzatzeko bideratuz, zorpetzera jo gabe”. Datu hori 2026rako aurrekontuaren azalpen memorian agertzen da.
Joxean Sanchez Udal Talde Sozialistako bozeramailearen ustez, argitalpenaren helburua EH Bilduk hauteskundeetan agindutakoa aurrera eramateko dituen zailtasunak justifikatzea da, baita arlo publikoa kudeatzeko eta promesetatik ekintzetara pasatzeko duen ezintasuna justifikatzea ere.
Gobernu-taldeak iragarri beharreko neurriei dagokienez, paradoxikoa da, adibidez, zerbitzu-kontratuen (garbiketa, lorezaintza...) berrikuspena iragartzea – beherantz ulertzen da –, eta azken osoko bilkuran kirol-instalazioak kudeatzeko kontratuaren lizitazioaren zenbatekoa %10 baino gehiago igotzea onartzea, edo funtzionarioen soldatak izoztuko direla iragartzea, eta abenduan bertan % 2,5eko igoera onartzea, 2025ari dagokionez.
Aurreko gobernu taldearen kudeaketa ekonomikoari buruz egiten dituzten aipamenei dagokienez, esan behar da talde horrek, udal zergak eta tasak izoztuz, EH Bilduren aurreko kudeaketatik aurkitu zuen 2 milioi eta erdi eurotik gorako zorra erabat amortizatzea lortu zuela.
Hau da, gaur egungo udal-zorra zero da, eta urte horietan inbertsio handia egin zen, esate baterako, auzoak berroneratzen eta irisgarritasunean igogailuak eraikiz. Horren arrazoia izan zen, besteak beste, erakundeen arteko inbertsio-apustua (Foru Aldundia eta Eusko Jaurlaritza) gogor landu zela.
Aurreko gobernu taldeak zergak eta tasak izozteari dagokionez, PSE-EErentzat neurri egokia eta kontzientea izan zen familien, enpresa txiki eta ertainen eta saltokien karga fiskala arintzeko, bereziki ziurgabetasun uneetan, hala nola COVID-19aren kudeaketan. Hau da, "herritarren poltsikoa lehenetsi zen, zerbitzu publikoak arriskuan jarri gabe".
Azkenik, Lezoko PSE-EEk "udal kontuen kaudimenean duen konfiantza berretsi du eta Gobernu Taldeak oinarririk gabeko alarmaren alde egitea deitoratu du, gardentasunaren eta publikoaren kudeaketa lasaiaren alde egin beharrean. Lezo ez dago galera egoeran, baina bere gobernua zorretan dago egiarekin ".
